Batang Fil-Japanese kinidnap

MANILA, Philippines - Palaisipan ngayon sa pulisya ang katotohanan kung talagang dinukot at pinakawalan ng mga armadong lalaki ang isang 11-anyos na bata na anak umano ng isang Hapones makaraang matagpuan ito ng pulisya sa gilid ng kalsada kama­kalawa ng gabi sa Makati City.

Nakilala ang biktima sa pangalang Sean Torres na nadaanan ng mga nagpa­patrulyang pulisya sa kanto ng Gil Puyat Avenue at Chino Roces St. sa harap ng isang bangko dakong alas-9 ng gabi.

Nang tanungin ng mga pulis kung sino at ano ang ginagawa niya, sinabi ng bata sa Ingles na dinukot siya ng mga arma­dong lalaki habang nasa ibaba siya ng tini­tirahang condominium. Isinakay umano siya sa isang puting close van ng mga suspek kung saan may tatlo pang batang babae na kasing-edad niya ang nasa loob ng sasakyan na pawang nag-iiyakan.

Mahigit isang oras umano silang ibi­niyahe hanggang sa ibaba siya ng mga suspek sa may Gil Puyat Avenue sa Makati City. Hindi naman maalala ng bata ang pangalan at lugar ng tinutuluyang condo­minium, pati na ang pangalan ng kan­yang mga magulang maliban sa pagsa­sabing anak siya ng Japanese national sa Pili­pinang ina. May hinala naman ang pulisya na na-trauma ang bata kaya’t ipinasiya nilang dalhin ang kaso sa Women and Children’s Protection Desk ng Makati police. (Danilo Garcia)