Sa panunuhol umano sa obispo: NBI official pinagpapaliwanag

MANILA, Philippines - Inatasan kahapon ni Acting Justice Secretary Agnes Devanadera ang National Bureau of In­ves­tigation (NBI) na imbes­ti­gahan ang isang umano’y opisyal ng NBI na nanuhol sa isang obispo upang manahimik sa usapin ng operasyon ng sugal.

Base sa ipinadalang memorandum order ng Ka­lihim kay NBI director Nestor Mantaring, parti­kular na tinukoy nito upang magpaliwanag si Director Constantino Joson ng NBI Cagayan Valley tungkol sa pagkakasangkot sa nasa­bing kontrobersya.

Nais ni Devanadera na ipaliwanag ni Joson sa loob ng 42-oras kung bakit hindi siya dapat papana­gutin tungkol sa nasabing anomalya.

Ang kautusan ng Ka­lihim ay bunsod sa mga lumabas sa pahayagan na pinangalanan ni Bayom­bong Bishop Ramon Ville­na si Joson na isa sa dalawang personalidad na umano’y nanuhol sa kanya ng pera kapalit ng panana­himik nito sa kwestyunab­leng operasyon ng Meri­dien Vista Gaming Corpo­ration (MVGC).

Itinanggi naman ng opis­yal ang nabanggit na suhulan at sinabing ang cash na binigay kay Bishop Villena ay donasyon ng sim­bahan at hindi suhol ka­sabay ng paninindigan na ang galing sa MVGC ay hindi illegal at ipinagkaloob ito sa obispo noong kan­yang kaarawan.

Nilinaw pa ni Joson na legal ang operasyon ng MVGC dahil rehistrado ang kanilang mga pa­peles sa Securities and Ex­change Commission (SEC) na may prangkisa mula sa Cagayan Eco­nomic Zone Authority (CEZA) at may pahintulot ng local go­ vernment units at provincial board ng Nueva Ecija. (Gemma Amargo-Garcia at Ludy Bermudo)