Engineering student todas habang nagri-review sa board

MANILA, Philippines - Hindi na umabot sa naka­takdang pagkuha ng Board exams sa Nobyembre ang isang civil engineering grad­uate ng Borlongan, Samar, nang matagpuang patay sa tinutuluyang kaanak, sa May­nila, habang nagre-review, sa Sta. Cruz, Maynila, kahapon ng umaga.

May ilang oras na uma­nong patay nang madiskubre ang biktimang si Dennis Baria, 34, binata, ng Borlongan, Samar at pansamantalang nakikituloy sa #559 T. Alonzo St., Sta. Cruz, Maynila.

Sa ulat ni Det. Richard Lumbad ng Manila Police District-Homicide Section, dakong 8:30 ng umaga nang gisingin ang biktima sa kan­yang silid ng tiyuhing si Fidel Baria, 67, upang mag-almusal subalit patay na ito.

Sinabi ni Fidel na nakita niya dakong alas-11 ng gabi kamakalawa na nanonod ng TV ang pamangkin, kinabu­ka­san nasilip niya na tulog ang biktima kaya di muna ginising subalit dakong alas-8 ng umaga nang balikan upang yayaing mag-almusal, nakita niyang nakahiga pa rin kaya nilapitan na at dito nadiskub­reng hindi na humihinga nang yugyugin para magising.

Ayon sa ulat ni Lumbad, ang biktima ay lumuwas sa Maynila nitong Mayo upang mag-review sa pagkuha ng CE Board exam na nakatakda sa Nobyembre 2009.

Inaalam pa ang sanhi ng pagkamatay ng biktima.