MANILA, Philippines - Nakahandusay at duguan ang sentido ng 54-anyos na ama nang matagpuan sa rooftop ng kanilang bahay ng kanyang anak sa Tondo, Manila, kamakalawa ng hapon.
Idineklarang patay nang idating sa Mary Johnston Hospital ang biktimang si Bienvenido Pullan, ng 1211 Asuncion St., Tondo.
Sa ulat ng pulisya, dakong alas-4 ng hapon nang maganap ang pagpapakamatay ng biktima sa rooftop ng kanilang bahay.
Sinabi ng kapitbahay ng nasawi na si Esther Torres, habang nakatayo siya sa tapat ng kanilang bahay ay nakarinig siya ng putok ng baril na nagmula sa itaas ng bahay ng mga Pullan kaya agad niyang sinabihan si Fellrose, 19, anak ng nasawi na alamin ang narinig niyang putok sa itaas ng kanilang bahay. Kanang bahagi ng sentido ang tama ng bala mula sa kalibre 9mm na narekober din sa tabi ng biktima.
Naniniwala naman ang pamilya ng nasawi na maaaring naaburido ito sa iniindang kumplikadong mga sakit. (Ludy Bermudo)