Floor manager patay sa holdap

MANILA, Philippines - Isang floor manager ng club ang natagpuang patay matapos na umano’y saksakin ng hinihinalang holdaper sa lungsod Quezon kahapon ng madaling-araw.

Kinilala ang biktima na si Jimmy Calaguas, 31, binata, empleyado sa Queen’s Castle at residente sa   Gen. Lim St., corner Gen. de Jesus St., Heroes Hills sa lungsod.

Malaki ang paniwala ng pulisya na posibleng nanlaban ang biktima na naging sanhi upang saksakin ito.

Lumilitaw na natagpuan ang bangkay ng biktima ng isang Angelica Ladag sa may Gen. Lim st., ilang hakbang ang layo sa bahay nito ganap na alas-5 ng madaling-araw.

Bago ito, alas-4:30 ng madaling-araw nang umalis sa kanyang pinapasukang Queen’s Castle sa Quezon Avenue, Brgy. Sta. Cruz ang biktima hanggang sa matagpuan itong walang buhay sa nasabing lugar na tadtad ng tama ng saksak sa buong katawan.

Nagkalat ang mga gamit ng biktima sa kalsada na pinani­niwalaan ng awtoridad na iniwan na lamang ng suspek sa kata­rantahan. Patuloy ang imbestigasyon ng awtoridad sa nasabing insidente. (Ricky Tulipat)