Bagitong pulis iginigisa

MANILA, Philippines - Kasalukuyang iniimbes­tigahan ng pulisya ang isang bagitong pulis na namaril at nakapatay sa isang 36-anyos na lalaki na umano’y tangka siyang tagain ng itak makaraang mabulahaw ito sa pagtulog dahil sa pag-iingay ng una kahapon ng madaling-araw sa Caloocan City.

Inaalam ngayon kung may pagkakasala si PO1 Julius Aldao, 34, na­ka­talaga sa Station 3 ng Quezon City Police District. Inimbitahan rin naman ng pulisya si Manuel Levita, 33-anyos, na kasama ni Aldao nang maganap ang pamamaril.

Nakilala ang nasawi na si Edwin Rodriguez, may-asawa, at naninirahan sa GSIS Subdivision, Brgy. 164. Nagtamo ito ng tat­long tama ng bala ng .9mm service firearm ni Aldao.

Nauna rito, sakay sina Aldao at Levita ng isang mo­torsiklo ngunit tumirik ma­karaang maubusan ng gasoline. Bumaba naman si Aldao at nagtungo sa bahay na katabi lamang ng tahanan ni Rodriguez na alam niyang nagbebenta ng tingi-tinging gasoline.

Maingay na kinatok ng pulis ang katabing bahay sanhi upang magising si Rodriguez. Galit na luma­bas ito at bitbit ang kan­yang itak upang sitahin ang nambubulahaw sa kan­yang pagtulog. Isang pag­tatalo ang naganap hang­gang sa umalingawngaw ang tatlong sunod na putok ng baril. (Danilo Garcia)