Matapos araruhin ang mag-ina: Prangkisa ng Jell Transport sinuspinde

MANILA, Philippines - Sinuspinde ng Land Transportation Franchising Regulatory Board (LTFRB) ng isang buwan ang prang­kisa ng Jell Transport bilang parusa sa naganap na aksidente sa Edsa Santo­lan kamakalawa ng hapon.

Sa aksidenteng ito, isang 3-anyos na bata ang namatay habang natang­gal ang kaliwang braso ng nanay nito nang araruhin ng bus ng Jell Transport na walang plaka na mina­ma­neho ni Mario Villamar   malapit sa  Edsa Santolan Flyover.

Kaugnay nito, sinabi din ni LTFRB Chairman Alberto Suansing na kanya ding ipatatawag ang may -ari ng naturang bus com­pany na si Elena Ong upang magbigay ng pali­wa­nag kung bakit hindi maaaring suspendihin ang prangkisa nito kaugnay ng insidente.

Muli, pinaalalahanan ni Suansing ang mga driver ng pampasaherong bus na palagiang mag-ingat upang maiwasang ma­ganap muli ang ganitong insidente.

Maging ang mga pe­des­trians anya ay maging maingat habang nasa gilid ng mga kalsada dahil ma­rami din ang mga abusa­dong driver na posibleng magpahamak sa kanilang buhay gaya ng naganap sa aksidenteng ito.

Tatlo na ang nama­matay sa aksidente sa lansangan na kagagawan ng bus ng Jell Transport ngayong taon ito na ang una ay noong Abril 2009. (Angie dela Cruz)