MANILA, Philippines - Dalawa sa apat na miyembro ng kilabot na bolt cutter gang ang napatay nang makipagbarilan sila sa pulisya makaraang looban nila ang isang computer shop sa Barangay Tandang Sora, Quezon City kaha pon ng madaling-araw.
Tinutukoy pa ng pulisya habang sinusulat ito ang pangalan at pagkatao ng napatay na mga magnanakaw at maging ng mga kasamahan ng mga ito na nakatakas.
Naganap ang sagupaan sa Tandang Sora Avenue malapit sa Roque Drive sa naturang barangay.
Nauna rito, pinasok ng mga suspek ang computer shop na nasa 18 San Isidro St. sa naturang barangay at pag-aari ni Augusto Cabana, 42.
Winasak ng mga suspek ang mga kandado ng shop sa pamamagitan ng bolt cutter bago pumasok at tinangay ang mga computer dito.
Pero natunugan ng Quezon City Police District ang nakawan pero nakipagbarilan ang mga suspek nang maharang sila ng pulisya sa labas.
Napatay ang dalawa sa mga magnanakaw pero nakatakas ang iba pang suspek na nang-agaw ng isang taxi.
Lumilitaw din sa pagsisiyasat na nagtamo ng maraming tama ng bala sa kanilang mga katawan ang mga napatay na biktima na siyang sanhi ng agarang pagkamatay ng mga ito. (Ricky Tulipat)