2 Intsik na drug lord timbog, P24-milyong shabu nasabat

MANILA, Philippines - Dalawang pinaghihinalaang big-time Chinese drug traders ang nasakote ng mga awtoridad kasunod ng pagkaka­samsam sa P24-milyong halaga ng shabu sa isinagawang drug-bust opera­tion sa Valenzuela City, kamakalawa.

Kinilala ni National Capital Region Police Office (NCRPO) director Chief Supt. Roberto Rosales ang mga nasa­koteng suspect na sina Tony Go, alyas Tony Chua, 39, ng Santiago St., Brgy. Ca­numay, Valenzuela City at Lang Ong, 34, ng Timog Avenue, Quezon City.

Ayon kay Rosales ang dalawang Chinese big time drug trafficker ay pawang tubong Fukien, China .

Sinabi ni Rosales na ang dalawang suspect ay nasakote sa drug-bust ope­ra­tions na isinagawa ng pinagsanib na elemento ng NCRPO at Northern Police District dakong alas-11 ng umaga sa Brgy. Canumay ng lungsod.

Ang matagumpay na pagkakaaresto kina Go at Ong ay bunsod ng masusing surveillance operations laban sa pagka­kasangkot ng mga ito sa ilegal na aktibidades.

Hindi na nakapalag ang mga sus­pect matapos na makorner ng arresting team ng pulisya.

Nasamsam mula sa mga ito ang apat na kilo ng metamphetamine hydro­chloride o ang mas kilala bilang shabu na tinatayang nagkakahalaga ng P24- milyon, isang kulay abong Honda Civic (XGY-393) at isang unit ng Samsung mobile phone.

Sinabi ni Rosales na ang mga sus­pect ay isinailalim na sa inquest pro­ceedings ng Office of the City Prose­cutor ng Valenzuela City kaugnay ng pag­labag sa Section 5 (Sale, Trading, Dispensation, Delivery) ng Section 26 (attempt or conspiracy) at Section 11 (Pos­session of Dangerous Drugs), Article II ng Republic Act 9165 o ang Com­­prehensive Dangerous Drugs Act of 2002.