Manggagawa ng magsasarang pabrika ng gulong nagpapasaklolo

MANILA, Philippines - Ngayon pa lang ay na­nanawagan na sa pama­halaan ang mga trabaha­dor ng higanteng paga­waan ng gulong sa bansa na Good­year Tire and Rubber Company sa Las Piñas City na bigyan sila ng ka­ukulang ayuda para maka­hanap ng malilipatang tra­baho bago pa man mag­sara ang nasa­bing pabrika sa Septyembre ng taong kasalukuyan.

Una na kasing nabatid kay Dave Morin, managing director ng nasabing kom­panya, na isasara na ang manufacturing facility ng Good Year Philippines sa Las Piñas City sa Set­yem­bre bunga na rin ng pagka­lugi sa export market ng kanilang produkto.

Ayon naman sa ilang nakapanayam na traba­hante ng nasabing pabrika, hinihiling nila sa pamaha­laang Arroyo na bigyang kalu­tusan ang patuloy na pagbagsak ng ekonomiya sa bansa upang mahinto na ang pagsasara ng mga naglalakihang kompanya at pabrika dahilan upang ma­walan ng trabaho ang ma­laking bilang ng masang Pilipinong katulad nila.

Sa ngayon ay proble­mado na ang mga mawa­walan ng trabahong mga manggagawa ng Good Year dahil ilang buwan na lamang anila ay mawa­walan na sila ng matinong pagkukuhanan ng kanilang makakain at panganga­ilangan sa araw-araw.

Nabatid na halos sing­kwenta porsiyento ng kita ng Goodyear Philippines ay nakasalalay sa pag-export ng kanilang gulong at sa nakatakda nilang pag­sa­sara ay may 600 traba­hante ang mawawalan ng trabaho. (Rose Tamayo-Tesoro)