2 maid pinainom ng ihi ng amo

MANILA, Philippines - Mistulang hayop na itinuring ng isang 35-an­yos na ginang ang dala­wang menor-de-edad nitong kasambahay ma­tapos ang walang pasu­baling pambubugbog ng una sa mga huli, sa Sam­paloc, Maynila.

Ang mga biktimang sina Jenalyn Ca­lambro at Liza Mirante, kapwa 17-anyos at tubong Iloilo City ay naghain ng   rekla­mo sa Manila Police District-Station 4-Women and Children’s Protection Desk, laban sa among si Joana Velez, 35, ng Vi­cente Cruz St., Sampa­loc, dahil sa umano’y ma­tinding pagmamal­trato nito sa kanila simula noong sila ay manilbihan dito noong Hulyo 8, 2008.

Anila, madalas silang pagbuhatan ng kamay ni Velez tulad ng pananam­pal, pagkurot sa buo nilang katawan, kung saan pati ang maselang bahagi ng dibdib nila ay nais nitong punitin. Pina­inom din umano sila ni Velez ng dalawang ba­song ihi nang matiyem­pu­han nitong may la­mang ihi ang inidoro.

Sinusuntok din uma­no sila ng naturang amo sa sikmura sa oras na hindi na nila maubos ang mga tira-tirang pagkain at ka­pag sila ay nasuka na ay ipapakain din sa kanila ito.

Noong March, 2009 ay binuhusan umano ng suspek si Calambro ng ma­init na tubig sa kan­yang likuran na naging sanhi para malapnos nang husto ang balat nito. Dahil din sa sobrang bugbog na ginagawa ni Velez sa mga biktima ay na­apektuhan ang daloy ng dugo ng mga ito kaya limang buwan na umano silang hindi dinaratnan ng buwanang dalaw.

Sa loob ng isang ta­ong paninilbihan ay P4,000 lang umano ang ibinigay na suweldo kay Calambro at P6,000 na­man kay Mirante. Anila, pinilit nilang makatakas kay Velez sa kabila ng pana­nakot nito na pati ang ka­ nilang pamilya sa probin­siya ay gagantihan nito sa oras na sila ay tu­makas. Nahaharap sa ka­song paglabag sa Child Abuse Law at Mal­treat­ment ang naturang sus­pek.