5 todas sa C5 road

MANILA, Philippines - Limang tao ang na­matay nang masaga­saan sila ng isang kot­seng Honda CRV na nawalan ng preno ha­bang tuma­tawid ang mga biktima sa C5 Road sa Parañaque City ka­hapon ng hapon.

Kinilala ng pulisya ang mga biktima na sina John Christian Alde, 10 anyos; kapatid na si John Lloyd, 11; pinsang si Joemari Bravo, 10; lolang si Nenita Lopez, 61; at ang pasahero ng CRV na si Justine Kaye Abiog, 16.

Nasa malubha na­mang kalagayan at gina­gamot sa Olivarez Hospital ang ina ni Abiog na si Maria Victoria, 40, na nagma­maneho ng kulay maroon na CRV na may plakang ZAZ-852 at ang pinsan ng magkakapatid na si Jerico Devine Flor, walong taong gulang, na dinala sa Las Pinas District Hospital.

Batay sa imbestigas­yon ng pulisya, nang­yari ang malagim na insi­­dente sa north bound lane ng C5 Road dakong alas-2:00 ng hapon ha­bang patawid ang mga biktima mula sa pag-ani ng mga itinitindang gulay sa palengke.

Galing umano sa Las Pinas City at patungo ng Parañaque ang kotse nang gitgitin sila ng isang hindi nabanggit na sa­sakyan kaya tuluyang nawalan ng kontrol at sumampa sa center island ng lansangan bago inararo ang mga tuma­tawid na biktima.

Nakaligtas naman sa kamatayan ang ina ng magkakapatid na Alde na si Janely Lopez Alda nang mauna siyang ma­katawid at naiwan sa gitna ng lansangan ang mga biktima.