Oil depot iaapela sa SC

MANILA, Philippines - Ang Oil depot ang isa sa mga establisimiyento sa bansa na lubhang binaban­tayan ng napakaraming pulis dahil sa seguridad.

Ito ang pinuna kama­kailan ni Manila Councilor Joel Chua na kabilang sa tu­mututol sa ordinansang nag­papahintulot sa patuloy na operasyon ng oil depot sa lunsod.

Sinabi ni Chua na, bukod sa Malakanyang at United States Embassy, ang oil depot ang may pinaka­maraming pulis na nagba­bantay na indikasyon na hindi ito ligtas sa pag-atake ng anumang grupo.

Sinabi ni Chua na lalapit sila sa Korte Suprema upang kuwestiyunin ang ligalidad ng ordinansa kasa­bay ng kanilang pakikipag-usap sa kani-kanilang mga constituents upang lubos na maunawaan ang masa­mang epekto ng pananatili ng oil depot sa Maynila.

Una nang sinabi ni Chua na ang pagpirma ni Manila Mayor Alfredo Lim sa ordi­nansa ay indikasyon ng pag­sang-ayon ng lungsod sa pag­pasok ng mga naka­ma­matay na kemikal kung saan binansagan din niya ang ordinansa na “Killing Me Softly” na unti-unting puma­patay sa mga resi­dente ng Pandacan at “She Bangs” na sa isang iglap ay posib­leng maglaho ang lungsod tulad ng naganap sa 9-11.