Tanker vs jeep: 8 sugatan

MANILA, Philippines - Walo katao ang malub­hang nasugatan makaraang salpukin ng isang rumara­gasang tanker truck ang si­nasakyan nilang pampasahe­rong jeepney bago muling sumalpok sa isa pang truck sa lungsod Quezon ka­hapon ng madaling-araw.

Kinilala ang mga biktima na Rogelio dela Cruz, 20; Marissa Salicob, 52; Rossa Salicob, 17; May Pacos, 53; Vergel Galanza, 30; Ergie Chiva, 22; at Orbano Danie­res, na ngayon ay gina­gamot sa East Avenue Medical Center dahil sa mga tinamong mga sugat sa ulo at katawan. Nangyari ang insidente sa may Edsa-Quezon Avenue flyover ganap na alas-4 ng madaling-araw.

Ayon sa report, binabag­tas ng naturang tanker (WJP-590) ang north bound lane ng EDSA nang biglang sumabog ang gulong nito dahilan para ma­walan ng kontrol sa mani­bela ang driver at sumalpok sa PUJ (TWW-648) lulan ang anim na pasaherong bik­tima. Sa lakas ng impact tumi­lapon ng ilang metrong layo ang jeepney bago tuluyang humam­pas ito sa paparating na dump truck (UHK-998). Dahil dito, nagtamo ng pin­sala sa ulo at katawan ang mga biktima ng nasabing jeepney kung saan ang ilan sa mga ito ay tumilapon sa labas ng na­sabing sasakyan dala ng lakas ng pagkaka­bangga.

Nagkaroon din ng tensyon at nagpanik ang ilang suma­sak­lolong rescuer sa mga bik­tima matapos na umusok ang ilalim ng jeepney malapit sa tanker sa pag-aakalang sa­sabog ito. Patuloy ang imbestigas­yon ng awtoridad sa nasabing insi­dente upang matukoy ang tunay na may kasalanan dito. (Ricky Tulipat)