MANILA, Philippines – Isang binata ang patay, habang tatlo pa ang malubhang nasugatan kabilang ang isang kagawad ng pulisya makaraang walang habas umanong magpaputok ng baril ang isang hindi nakikilalang lalake sa lungsod ng Quezon kamakalawa.
Kinilala ni Supt. Antonio C. Yarra, hepe ng Batasan Police Station 6 ang nasawi na si Aaron Caraan, 24, ng Saint Catherine St., Brgy. Holy Spirit, Quezon City.
Habang ang mga sugatan naman ay kinilalang si Roy Sefriano, 21; Miguel Nieva, 44, at si SPO1 Byron Domingo, 53.
Base sa ulat ng pulisya sa Station 6, nangyari ang insidente sa may Saint Catherine St.,Brgy. Holy Spirit dakong alas-11 ng gabi.
Diumano, naglalakad ang nasawing biktima at kasama si Nieva nang bigla na lamang sumulpot ang isang suspek na armado ng baril at pinaulanan ng bala ang mga una.
Nang mapawi ang usok, nakita na lamang na duguang nakabulagta at wala ng buhay si Caraan at may tama naman ng bala sa binti si Sefriano.
Sinasabing rumesponde naman ang pulis na si Domingo at barangay tanod ngunit maging ito ay pinagbabaril din ng nasabing suspek.
Nakaratay ngayon sa General Malvar Hospital si Nieva pati na si Sefriano habang si Domingo naman ay nasa East Avenue Medical Center. Patuloy naman ang isinasagawang imbestigasyon ng awtoridad sa nasabing insidente. (Ricky Tulipat)