P80-M pumping station, solusyon sa pagbaha sa Maynila

MANILA, Philippines - Tiniyak ni Manila Mayor Alfredo S. Lim na maba­bawasan ng halos 40 porsiyento ang pagbaha sa lung­sod sa pagsi­simula ng operasyon ng Abucay Pumping Station na nagka­kahalaga ng P80 milyon.

Ayon kay Lim, inatasan na niya si City Engineer Armand Andres na buksan na ang nasabing pumping station kung saan responsable sa paghigop ng mga tubig-baha sa Districts I, II, at III. Ito rin aniya ang dahilan kung bakit naging mabilis ang paghupa ng baha sa kahabaan ng Avenida Rizal, kalye ng Antipolo at iba pang karatig kalye na laging nalulubog sa tubig baha.

Binanggit pa ni Andres na maliban sa pagbubukas ng Abucay Pumping station ay naging malaking tulong din ang ginawang de-clogging ng mga kanal at imburnal at mga sewerage system sa mga nabanggit na distrito dahil mabilis ang nagiging daloy ng tubig na hinihigop ng nasabing pumping station.

Ang nasabing de-clogging ay magkatuwang na ginawa ng MMDA at ng Manila City Engineer’s Office kug saan kapwa nagsabing panay mga solid plastics pa rin ang siyang pa­ngunahing dahilan ng pagbabara sa daluyan ng tubig-baha.

Samantala, binanggit ng tanggapan ni Andres na sa kasa­lukuyan ay wala na silang suliranin sa mga nawa­walang takip ng manhole dahil ito ay napalitan na ng mga concrete slabs kung kaya’t hindi na ito mapag-iinteresan ng mga mahihilig sa bakal.

Sinabihan na rin ng City Engineer ang tanggapan ng Maynilad, PLDT, at iba pang nagsasagawa ng mga pag­hu­hukay sa Maynila na kaagad na lagyan ng takip ang kanilang mga hinuhukay kung hindi man pemanenteng maibalik sa ayos upang hindi maging panganib sa commuters at sa sibilyan. (Doris Franche)