MANILA, Philippines – Nasawi ang isang babaeng manager ng isang information technology company makaraang ba rilin ng riding-in-tandem kahapon ng umaga sa Pasig City.
Idineklarang dead-on-arrival sa The Medical City ang biktimang nakilalang si Liberty Liwanag, 40, sales manager ng AXUS International Inc., at residente ng Millenium Garden, Jenny’s Avenue, Brgy. Rosario ng naturang lungsod.
Sa inisyal na ulat ng Pasig City police, naganap ang pananambang dakong alas-10:50 ng umaga sa may Julia Vargas Avenue, Brgy. San Antonio. Nabatid na sakay ang biktima ng kanyang Toyota Rav4 (XPE-377) at patungo sa kanyang opisina sa ika-29 na palapag ng Antel Global Corporate Center sa Ortigas Center, Pasig nang tambangan ng mga salarin.
Nabatid na sunud-sunod na pinagbabaril ng gunman ang biktima habang umaandar pa ang kotse nito kung saan tinamaan ito sa balikat at tagiliran ng katawan na tumagos sa dibdib nito. Mabilis na tumakas ang mga salarin sakay ng isang motorsiklo sa hindi mabatid na direksyon.
Agad namang rumesponde ang “rescue team” ng Metropolitan Manila Development Authority (MMDA) at isinugod sa pagamutan ang biktima kung saan binasag pa ang bintana ng kotse upang makuha ang huli.
Habang isinusulat ito, blangko ang mga awtoridad sa pagkakakilanlan ng mga salarin dahil sa hindi naaninag ng mga nakasaksi ang mga suspek at blangko pa rin sa motibo ng naturang krimen. Hinihinala naman ng pulisya na planado ang naturang krimen na maaaring ipinaupa sa mga bayarang hitman.