MANILA, Philippines – Isang lalaking pinaniniwalaang biktima ng salvage na may tama ng bala sa dibdib at may saksak sa katawan ang natagpuang lumulutang sa Manila Bay sa Tondo, Maynila, kamakalawa ng hapon, habang isa pa nitong kasama ang namatay naman sa lunod.
Ang mga biktima ay kinilalang sina Gary Antonio, 38, ng Road 10, Del Pan St., Tondo na may tama ng bala at saksak sa katawan, habang ang isa pang biktima, si Norman Branzuela, 32, electrician ng 1200 Wagas St., Tondo, ay patay naman sa pagkalunod.
Sa ulat ni Det. Virgo Villareal ng Manila Police District-Homicide Section, dakong alas-2 ng hapon, kamakalawa nang magkasunod na matagpuan ang mga bangkay sa Manila Bay na sakop ng Isla Puting Bato, Tondo.
Habang isang mangingisda na nakilalang Virgilio Mecasusi, ang nagpahayag na imbestigador na nakita niyang buhay pa si Branzuela na kumakaway at humihingi ng tulong. Nang malapitan na niya ay palubog na umano ito at hindi na naisalba pa.
Nabatid na ang dalawa ay nagpaalam sa kanilang mga pamilya para makipag-inuman sa mga kaibigan sa Parola Compound.
Ayon sa imbestigador , posibleng sinaksak at nakatakas si Antonio kaya binaril ito hanggang sa mapatay habang ang kasamang si Branzuela ay tumakas sa kalaban sa pamamagitan ng pagtalon sa Manila Bay at tuluyan nang nalunod dahil wala namang nakitang palatandaan na siya ay pinahirapan. (Ludy Bermudo)