Bus nagliyab

MANILA, Philippines - Isang pampasaherong bus ang nagliyab habang tumatakbo sa kahabaan ng Roxas Blvd., kahapon ng madaling-araw sa Parañaque City.

Batay sa ulat, dakong alas-12:30 ng madaling-araw nang magliyab ang naturang bus sa tapat mismo ng Baclaran church sa Roxas Boulevard, nabanggit na lungsod.

Nabatid na kagagaling lamang sa Cavite ng Jasper Bus Line (TVG-924 ) na minamaneho ni Mullah Cantos at kasalukuyang tinatahak   ang kahabaan ng southbound lane ng Roxas Boulevard nang biglang umusok ang makina ng nasabing sasakyan hanggang sa tuluyang magliyab.

Nagdulot naman ng sobrang pagka-taranta ng humigit-kumulang sa 30-pasahero ang naturang senaryo, dahilan upang nag-unahang magtalunan ang mga ito palabas sa mga bintana ng bus nang tuluyang magliyab ito. Lumalabas sa imbestigasyon, na nag-overheat ang makina ng naturang bus na nagresulta sa tuluyang pagkasunog nito. (Rose Tamayo-Tesoro)