MANILA, Philippines - Patay agad ang miyembro ng isang banda makaraang sumalpok sa puno ng Ipil-ipil sa isang center island ang minamaneho niyang kotse kamakalawa ng umaga sa C-5 Road Taguig City.
Dahil sa tindi ng pagkakabangga natanggal ang buong hood ng harapan ng sasakyan at maging ang gitnang bahagi nito ay napitpit rin na parang lata na nagresulta sa agarang pagkamatay ni Ruben “Jun” Lacanieta, 48, binata, miyembro ng “Amadeus Band.”
Galing sa isang kasamahan sa banda si Lacanieta sa Brgy. Signal Village at nakipag-inuman matapos manggaling sa pagtugtog sa Mall of Asia sa Pasay City.
Bagaman nakainom na ay minabuti pa rin na umalis ng biktima at minaneho pa rin niya ang kanyang puting Honda City Sedan upang umuwi sa kanilang bahay sa Wak-Wak Subd., Mandaluyong City.
Habang binabaybay ng biktima ang kahabaan ng C5 Road, sumalpok ang kotse nito sa center island at bumangga pa sa isang puno ng Ipil-ipil. (Rose Tamayo-Tesoro)