Staff ni Enrile nanampal at nambatok ng 2 pulis

MANILA, Philippines - Inaresto ng pulisya ang isang nagpakilalang staff ni Sen. Juan Ponce Enrile matapos sampalin at batukan pa nito ang da­lawang pulis na aaresto sana sa kanya matapos siyang mahuli sa aktong nagtotong-its sa gilid ng kalsada kamakalawa ng gabi sa Malabon City.

Kinilala ng pulisya ang suspek na si Alex Da­coco, 52-anyos, ng Dizon St., Tinejeros ng nabanggit na lungsod.

Sa pahayag nina PO1 Emerson Pedrasta at PO1 Marcelino Bonit, kapwa ng Malabon City Police, isang hindi pa naki­­kilang babae ang ka­nilang nakita na nagpa­pa­taya ng iligal na sugal “loteng” sa na­ sabing lugar.

Bago malapitan ng dalawang pulis ang ba­bae ay nagtatakbo ito na naging dahilan upang habulin subalit nadaanan ng mga una si Dacoco na nagtotong-its din sa kalsada.

Nilapitan ng dala­wang pulis si Dacoco habang nakatakbo naman ang mga katong-its nito kung saan nang aarestuhin ang suspek ay humingi ito ng warrant of arrest sa mga una.

Nagpaliwanag ang mga pulis na kahit walang warrant of arrest ay na­aktuhan naman nila si Dacoco na nag-totong-its.

Sa kabila umano ng paliwanag ng dalawang pulis, nagalit ang suspek at agad itong nagpaki­lalang staff ni Enrile sabay sampal at batok sa mga una.

Dahil dito, walang sa­litang binitbit ng dala­wang pulis si Dacoco at dinala sa presinto.