2 tauhan ng MMDA dedo sa motorsiklo

MANILA, Philippines - Dalawang tauhan ng Metro Manila Development Authority (MMDA) ang nasawi sa isang self-vehicular accident sa Nagtahan Bridge, sa Sta. Mesa, Maynila, kama­kalawa ng gabi. Dead-on-the-spot si Zaldy dela Cruz, habang namatay sa pagamutan ang angkas nitong si Arnel H. Bulanday, at ang isa pang biktima na gina­gamot sa De Ocampo Hospital na si Arnel Canaets, 27. Sa report ng pulisya, dakong alas-10:15, kamakalawa ng gabi nang maganap ang insidente sa South-bound ng Nagtahan flyover, sa Sta. Mesa. Nabatid na sakay ang tatlo sa isang Honda Wave na motorsiklong may plakang HU-1766 nang biglang tumilapon dahil sa pa­gewang-gewang na pagmamaneho umano ni Dela Cruz at pagbunggo nito sa rehas na bakal ng tulay. Kagyat na binawian ng buhay si Dela Cruz, ang driver ng motor­siklo habang alas-2:10 ng madaling-araw idineklarang patay si Bulanday. Batay din sa impormasyon, galing umano sa inuman ang mga biktima at posibleng hindi na nagawang mabalanse ni Dela Cruz ang pagma­maneho. Nakatalaga umano ang tatlo sa sidewalk clear­ing operations ng MMDA sa Maynila. (Ludy Bermudo)