Nangikil sa 2 estudyante, timbog

MANILA, Philippines - Nahulog sa kamay ng awtoridad ang 32-anyos na lalaki matapos na tangkain nitong kikilan ang dalawang nursing student kapalit ng pangakong ma­ga­gawan niya ng paraang maipasa ng mga huli ang bagsak nilang subjects, kamakalawa ng hapon sa Las Piñas City.

Nasa aktong tinatang­gap na ni Edmon Calitas, ng Dalandan St., San Isidro Subdivision, Las Piñas ang P9,000 na markadong salapi sa mga biktimang sina Mark Erick Aquino, 22 at Maridie Con­cepcion, 20 nang dakmain ang una ng mga awtoridad sa isang Fast food restaurant sa Pamplona 3, Za­pote-Ala­bang Road, da­kong ala-1:30 ng hapon.

Bago ito unang natuk­lasan ni Aquino na bagsak siya sa dalawang subjects sa University of Perpetual Help - Las Piñas kung kaya’t sa pangambang hindi siya mapasama sa mga magtatapos ay huma­nap siya ng paraan hang­gang sa makilala niya si Calitas noong March 12 ng taong kasalukuyan.

Unang nakipagkita si Calitas kay Aquino noong March 20 at ipinagmalaki umano ng suspect na nala­kad niya ang bagsak na subjet ng isang Bryan Colorado sa halagang P180,000.

Ipinakilala naman ni Aquino ang suspect kay Concepcion na may bag­sak ding subject at hinimok din ang dalaga na magba­yad na lamang upang ma­pa­sama rin sa mga magta­tapos.

Dito hinikayat ng suspect ang dalawa na mag­bigay muna ng down payment na P9,000 at ang kabuuan ay ibigay na lamang sa March 27, 2009 dahil ito umano ang ibini­gay na deadline ng opisyal ng unibersidad na kontak niya para mapasama sila sa mga magtatapos at mabago ang bagsak nilang grado.

Gayunman, bago ma­ka­pagbigay ng naturang ha­ laga ang mga biktima, nagtanung-tanong muna sila sa iba pang mga estud­yante sa naturang paman­tasan at natuklasan na pan­lilinlang lamang ang lakad ni Calitas kung kaya’t nag­pa­siya ang dalawa na isu­plong sa pulisya ang suspect dahilan upang mada­kip ito. (Rose Tamayo-Tesoro)