Binatilyo binigti sa basketball court

MANILA, Philippines - Malaking palaisipan sa mga tauhan ng pulisya ang pagkamatay ng isang 17-anyos na bina­tilyo na natagpuang na­kabitin at walang buhay sa isang basketball court sa lung­sod ng Pasig kama­ka­lawa ng gabi.

Inaalam kung nagbigti ba o sadyang binigti ang biktima.

Ayon kay Isagani del Rosario, Asst. Ex.Officer ng Brgy. San Joaquin, wala silang nakikitang dahilan upang magpaka­matay ang binatilyong si Rodnel Datu, out of school youth ng Austria Compound, sa kanilang barangay dahil sa kabila ng pagiging makulit nito ay hindi nito magagawa ang mag-isang magtali ng alambre sa basketball court kung saan ito na­tagpuang patay.

Maging ang nanay ng biktimang si Nida Datu, ay wala ring alam kung anong motibo ng anak para mag­pakamatay gayong wala naman umano itong bina­banggit na anumang prob­lema sa kanila.

Base sa ulat, ganap na alas-8 ng gabi nang matuklasan ang walang buhay na katawan ng biktima habang naka­bitin gamit ang alambre sa itaas ng isang basketball court na mata­tag­puan sa Block 1 Austria Compound. Bago nito, kauuwi lamang umano ang bik­tima mula sa outing ka­sama ang kanyang mga kaibigan nang mag­paalam ito sa kanyang nanay na mag­­papa­ha­ngin sa bas­ketball court.

Sinundan pa ni Aling Nida ang anak sa basketball court para matiyak na doon ito nagpunta at nang masigurong naroon ay saka nagpasya itong umalis para bumili ng sigarilyo para makipag-kwentuhan na rin dito. Ilang minuto ang lumipas pagkabalik ni Aling Nida ay laking gulat nito nang makita ang anak na nakabitin sa itaas ng basketball court at hinahabol ang hininga.

Agad na­mang humi­ngi ng saklolo si Aling Nida sa kapit­bahay kung saan na­gawa pang ma­itakbo ang biktima sa Rizal Medical Center ngunit idineklara din itong patay.

Patuloy ang imbes­tigasyon ng awtoridad hingil sa insidente.