Kabilang ang nobyo: Dalagita ginang-rape ng 4

MANILA, Philippines - Kiss mark sa dibdib  ang naging susi upang mapaamin ang 15-anyos na dalagita ng kan­yang ama sa halinhinang panggagahasa umano ng apat na bagets kabilang ang nobyo ng una, kama­kalawa ng gabi sa Sampaloc, Maynila.

Idinulog ng biktimang itinago   sa pangalang “Lotlot”, out-of-school youth, ng Sam­paloc, Maynila,  kasama ang kanyang amang hindi nagpabanggit ng pangalan sa Manila Police District-Station 4, ang reklamo laban sa mga suspek na itinago sa pangalang  Jun, 15; George, 16; at  Joseph, 16, at ang 17-an­yos na nobyo ng biktima na itinago sa pangalang Wally.

Nabatid na dakong alas- 3:30 ng madaling-araw ay nag­duda umano ang ama sa hitsura ng anak hanggang sa makita ang marka o kiss mark sa dibdib nito kaya sapilitang pinaamin.

Dahil dito, agad na nagsum­bong sa barangay officials ang mag-ama hinggil sa pangha­halay kaya isa-isa umanong tinungo ng mga tanod at opisyal ang bahay ng mga suspek sa Craig St.

Nasa kasagsagan umano ng tulog nang arestuhin ang mga suspek at dinala sa MPD-Station 4. Nang imbestigahan, umamin ang nobyo ng biktima kay PO2 Anna Lopez ang paki­kipagtalik sa biktima at ibinun­yag na matagal na nila uma­nong ginagawa iyon subalit idi­nepensa nito na may iba pang gumalaw sa dalagita.

Subalit kinontra ito ng bik­tima at sinabing ang tatlong ka­barkada ay gumamit din sa kanya habang lasing na lasing ang nobyo.

Una rito, isang barkadang tomboy ng biktima umano ang nagyaya na makipag-inuman at isinama nila si Wally at idinaos ito sa bahay ng isang suspek kung saan nakainuman din ang dalawa pang suspek. Nang ma­lasing at makatulog umano si Wally ay pinilahan na ang bik­tima ng tatlong kainuman.

Hinihintay pa ng pulisya ang medico-legal result at pag-aaralan kung ang lahat ay masa­sampahan ng kasong rape dahil may batas na nagbi­bigay ng proteksiyon sa mga menor-de-edad na hindi ma­aaring sampahan ng kaso o Juvenile Justice Law. (Ludy Bermudo)