Pinagsasaksak at binagsakan ng bato sa ulo hanggang sa mapatay ang isang 30-anyos na mister ng kanyang kaaway matapos talunin ng una ang huli sa kanilang suntukan, kamakalawa ng gabi sa Caloocan City.
Namatay sa mismong lugar ng pinangyarihan ng insidente ang biktimang si Russele Quarte, construction worker ng Purok Laloma, Camarin ng nabanggit ng lungsod.
Kasalukuyan namang nakapiit ang suspek na si Gerry Batis, 23, isa ring construction worker at kapitbahay ng biktima.
Sa imbestigasyon, dakong alas-10 ng gabi nang maganap ang insidente malapit sa bahay ng biktima.
Base sa salaysay ng mga nakasaksi, nagkaroon ng mainitang pagtatalo sa pagitan ng biktima at ng suspek hanggang sa magkahamunan ng suntukan ang mga ito.
Ayon pa sa ulat, nang matalo ng biktima ang suspek sa suntukan ay bigla na lamang binunot ni Batis ang dalang patalim at agad na inundayan ng magkakasunod na saksak si Quarte. Hindi pa nakuntento, nang nakahandusay na ang biktima ay binagsakan pa ito ng malaking bato sa ulo ng suspek dahilan upang tuluyan itong bawian ng buhay.
Kaagad namang nadakip ng mga rumespondeng tanod at mga pulis ang nabanggit na suspek. (Lordeth Bonilla)