Matapos ang halos walong oras na pag-aantabay, nalansi o hinihinalang gumamit umano ng “decoy” ang mga hostage-takers para lituhin ang mga awtoridad kung kaya’t nagawang matakasan ng mga ito ang sangkaterbang operatiba habang bitbit ang hostage victim at Medal of Valor awardee na si PO2 Jamaron Sandag.
Ayon kasi sa pahayag ni Col. Eleazar Mata ng Taguig crisis management unit, pinatay muna ng mga suspect ang mga ilaw sa loob ng Taguig Plaza Apartelle bago maingat na tumakas sa naturang lugar kung kaya’t wala na ang mga ito nang halughugin ng Special Weapons And Tactics (SWAT) ang loob ng gusali. Dahil dito, maging ang mga residenteng nakatira sa paligid ng gusali ay hindi rin namalayan ang paglabas ng mga suspect.
Nabatid na mula nang ikasa ang operasyon kamakalawa ng hapon para sa posibeng pagliligtas sa biktima, pasado alas-10 na ng gabi kamakalawa nang madiskubre ng opertatiba na wala sa loob ng naturang gusali ang biktima at sinasabing mga hostage-takers nito na dati ring mga miyembro ng Special Action Force (SAF) ng PNP.
Matapos ang may walong oras na paghahalughog ay hindi nakita ang biktima, maging ang kanyang mga hostage taker. (Rose Tamayo-Tesoro)