Sabog ang bungo at patay agad ang isang hindi nakikilalang lalake matapos na umano’y mahulog mula sa ika-11 palapag ng isang gusali sa lungsod ng Pasig kahapon ng umaga.
Ang biktima ay tinatayang nasa gulang 40-anyos, tsinito, balingkinitan ang katawan, 5’4’’-5’5’’ ang taas, moreno, walang damit sa itaas at nakasuot ng checkered style short pants.
Ayon sa inisyal na report naganap ang insidente sa may Ledge City Land Mega Plaza na matatagpuan sa ADB Ave., Ortigas Center Pasig City ganap na alas-8:40 ng umaga.
Sinasabing natagpuan na lamang ang walang buhay na katawan ng biktima ng guwardiyang si Rodante Gaerlan, 37, habang nakahandusay sa ibabaw ng simentadong gusaling nasa ibaba ng nasabing gusali.
Isang saksi na si Michel Fillo, na bago ang insidente ay nakakita siya ng isang tila mabigat na bagay ang bumagsak mula sa nasabing palapag paibaba nito.
Kung kaya agad niya itong ipinagbigay-alam sa mga guwardiya, hanggang sa matuklasan ang bangkay ng nasabing biktima.
Sa kasalukuyan, patuloy ang imbestigasyon ng awtoridad sa nasabing insidente upang malaman kung ano ang tunay na dahilan ng pagbagsak ng biktima mula sa nasabing gusali. (Ricky Tulipat)