'Fraternity group' nanghoholdap

MANILA, Philippines - Iniutos kahapon ni Ma­nila Mayor Alfredo S. Lim na walisin ang mga nag­pa­panggap na fra­ternity group sa bisinidad ng mga paaralan sa May­nila na gumagamit ng modus ope­randi para makatangay ng mga ma­hahalagang kaga­mitan ng mga estudyante.

Kasunod ito ng ulat na nakarating sa tanggapan ng alkalde hinggil sa rek­lamo ng ilang college stu­dents na natangayan ng mga cellphone, wallet, bag at kagamitan ng sampung di umano’y nagpapanggap na mga miyembro ng isang fra­ternity group, sa Intra­muros, Maynila, kamaka­lawa ng hapon.

Sa blotter ng Manila City Hall-Special Police Unit, nabiktima ng hindi pa natutukoy na mga sus­pect sina Timothy Gatan, 18, 2nd year stu­dent sa Ma­pua Institute of Tech­nology (MIT); John Argon Lim­lauco,18, 2nd year student ng MIT; at Irwin Cabrera, 24, ng Fairview, QC.

Sa reklamo ni Gatan kay PO3 James Poso, alas-5:30 ng hapon nang lapitan siya ng dalawa sa mga suspect habang nag­­ la­lakad sa kaha­baan ng Intramuros Golf Course at pilit na pina­ aako na may binastos siyang babae na ka­miyembro umano ng fraternity ng mga suspect.

Pinilit umano siyang pa­tunayan na wala siyang kasalanan kaya dinala siya sa mga ka­grupo ng mga suspect upang kilalanin umano kung siya ang nam­bastos subalit pina­iwan umano sa iba pang sus­pect ang lahat ng kanyang gamit.

“Sumama ako, pero pinaiwan nila iyong bag ko cellphone at wallet at pag­balik ko wala na iyong mga gamit ko at ’di ko na sila nakita,” ani Gatan.

Lingid sa kaalaman ni Gatan, ganun din ang gi­na­wa sa dalawa pang bik­timang sina Limlauco at Cabrera ng iba pang ka­samahan ng nagpa­pang­­gap na fraternity group ga­mit din ang naturang modus.

“Wala kaming ma­gawa kasi marami sila, natakot kami, baka ga­wan nila kami ng ma­sama kaya umalis na lang kami na hindi na namin na­kita ang ku­muha ng mga gamit namin,” dag­dag pa ni Gatan.

Nang ipakita sa mga biktima ang photo gallery ng mga criminal, nadis­kubre na isa sa mga sus­pect ang naroroon sa la­ra­wan sa rekord ng mga kriminal. Sinabi naman ni PO3 Poso na nakunan nila ng la­rawan ang isa dahil na­huli na ito nila sa hol­dap. “Nahuli na namin ito may ilang beses na, pina­ka­huli yung sa loob ng SM, may hinoldap na babae,” ani Poso.

Ayon kay Lim, hindi dapat na ­ang mga sus­pect ay nasa sa lugar ng mga pa­aralan o saan man sa lungsod kaya’t dapat silang ares­tuhin at ka­suhan. (Ludy Bermudo)