MANILA, Philippines - Isang 14-anyos na totoy ang nasawi, habang sugatan naman ang isa pa niyang kasamang nagbabasura makaraang matamaan ng ligaw na bala nang magsagupaan ang dalawang gang sa Tondo, Maynila kamakalawa ng hapon.
Namatay habang ginagamot sa Tondo Medical Center si Jaime De Leon 14, basurero at residente ng #233 Rodriguez st., Balut, Tondo, Maynila.
Habang nasa kritikal pa ring kalagayan sa nabanggit na ospital ang kaibigan ni de Leon na si Marjim Villamor 13. Nagsasagawa ng follow-up operation ang pulisya laban sa mga suspect na miyembro ng di nabatid na gang.
Sa ulat ni Det. Jaime Gonzales ng Manila Police District-Homicide Section, dakong alas-5 ng hapon nang maganap ang pamamaril sa Radial 10, tapat ng Building 3, Temporary Housing, Balut, Tondo.
Sa pahayag ng isang Rosalie Trangea, 54, residente sa lugar, napansin niyang nagrarambulan ang mga kabataan na pawang miyembro ng magkalabang gang habang ang dalawang bata ay namataan niyang namumulot ng basura. Ilang sandali pa ay umalingawngaw ang putok ng baril kasunod ang panakbuhan hanggang sa makitang duguan na ang dalawang biktima.
Isinugod ng mga nakasaksi ang dalawang bata sa nasabing ospital subalit agad ding idineklarang patay si De Leon.
Patuloy pang iniimbestigahan ang insidente. (Ludy Bermudo)