Bakla buking sa nakaw

Umaabot sa P60,000 halaga ng mga salapi at mga cell­phone ang natangay ng isang 24-anyos na bakla maka­raang pasukin nito ang isang tindahan ng cellphone kama­kalawa ng hapon sa Marikina City.

Subalit dahil sa pagmamayabang sa kanyang mga ka­barkada ay naaresto ng pulisya ang suspek na si Eduardson Arabe, 24 anyos, residente ng 216 Balubad NHA Barangay Nangka ng nasabing lungsod.

Sa ulat, dakong alas-4:00 ng hapon kamakalawa nang pasukin umano ng suspek ang tindahan ni Joel Inocentes, 29-anyos sa nasabing ba­rangay at pagkatapos tangayin ang P20,000 cash at ibat-ibang mamahaling cellphone ay mabilis itong tumakas patungo sa kanyang mga kabarkada sa Rodriguez, Rizal.

Nang matuklasan naman ng bitkima ang ginawang pan­loloob sa kanya ng suspek ay agad itong humingi ng tulong sa Marikina police na nagsagawa ng follow-up operation.

Isang bakla naman na kakilala ng suspek ang nag­ma­gandang-loob sa awtoridad at itinuro ang kinaroroonan ng suspek sa Rizal dahil nagyayabang umano ito sa mga ka­bar­kada na gigimik sila at ililibre silang lahat dahil madami siyang pera.

Naabutan pa ng pulisya ang suspek na nakikipag-inu­man sa kanyang mga kaibigan at nang tignan ang dalang bag nito ay nasa pag-iingat pa nito ang ibat-ibang klase ng mamahaling cellphone at pera na kanyang ninakaw.

Kasalukuyang nakapiit sa Marikina detention cell ang suspek habang inihahanda ang kaukulang kaso laban dito. (Edwin Balasa)