2 sunog, 500 pamilya nawalan ng bahay

Mahigit 400 pamilya ang nawalan ng tahanan sa loob lamang ng halos isang oras dahil sa ma­laking sunog na naganap, kahapon ng madaling-araw sa Makati City.

Ayon sa ulat ng Makati Bureau of Fire Protection (BFP), pasado alas-5 nang maganap ang sunog sa Medina St., Pio del Pilar ma­lapit sa Skyway ng na­banggit na lungsod.

Nabatid na umabot ng ika-limang alarma ang naturang sunog bago ito tuluyang na-kontrol.

Sa inisyal na imbesti­gasyon ng BFP, napabaya­ang kandila mula sa bahay ng isang Gregorio Gon­zales ang naging dahilan ng paglaki ng apoy.

Wala namang nasawi sa insidente, subalit suga­tan naman ang isang Richard Andrade matapos matamaan ng nagliliyab na mga kahoy habang inili­likas ang kanilang mga kagamitan.

Samantala, sa Quezon City mahigit 100 pamilya ang nawalan ng tirahan makaraang masunog ang isang “squatter’s area” dito kahapon.

Apat naman na resi­dente ang naiulat na na­saktan sa naturang sunog na nag-umpisa pasado alas-12:30 kahapon ng hapon sa squatter’s colony sa Sitio Militar, Brgy. Bahay Toro ng naturang lungsod.

Tumagal ang sunog ng halos dalawang oras kung saan umabot ito sa ika­limang alarma. Umaabot sa 50 kabahayan ang sina­sabing natupok sa natu­rang sunog.

Ilan sa tinitignang ang­gulo ang posibleng pag­sabog ng iligal na “jumper” sa kuryente habang isa pang nakikitang sanhi ng apoy ay ang naiwang kan­dila na ginamit ng isa sa mga residente na pang­sindi sa uling na gamit pang­luto. (Rose Tesoro at Danilo Garcia)