4 naulila ng napatay na sibilyan 'inampon' ng PNP

Tuluyang kinalinga ng National Capital Region Office ang apat na anak ng isa sa mga limang si­bil­yan na nadamay sa isang enkuwentro ng mga pulis at holdaper sa Parañaque kamakailan.

Sinabi ni NCRPO Chief Director Leopoldo Bataoil na pati pag-aaral ng mga naulilang anak ni Ronald Eusebio, isang empleyado ng Skyway, ay sasagutin ng kaniyang tanggapan hanggang sa makatapos ang mga ito sa kolehiyo.

Kinilala ni Bataoil ang mga anak ng biktima na nga­yon ay pawang scho­lar na sina Angela, 13; Je­rome Alfred, 11; Angelo, 6 at Ronaldo, isang-taong gulang.

Napag-alaman kay Ba­taoil na si Angela ay isasailalim sa kanyang responsibilidad, si Gen. Gatdula naman ng Que­zon City Police District para kay Jerome, Gen. Ca­­lungsod ng Manila Police District para kay Angelo at Rosales rin ng MPD ang kakalinga naman kay Ronaldo.

Magugunita na si Eusebio ay isa sa limang sibilyan na nadamay sa naganap na enkwentro sa pagitan ng mga ope­ra­tiba ng pulisya, “Waray-Waray” at Ozamis Rob­bery syndicate kamaka­ilan sa Sucat, Parañaque.

Una ring napagka­ma­lan si Eusebio na kasa­ma­han ng mga suspek.

Si Eusebio ay nauna nang nilinis ni Philippine National Police-Internal Affairs Service Chief Di­rector Jaime Tagaca na hindi kabilang sa mga suspek.

Base sa ipinalabas na sertipikasyon ng Skyway Corp., ang 39-anyos na si Eusebio ay Asst. Su­per­visor ng kanilang tang­gapan na nauna nang pinagkamalang kabilang sa sampung mga napatay na robbery/holdup gang. 

Lumilitaw naman sa imbestigasyon na hina­rang ng isa sa mga sus­pek na dating miyembro ng Army Scout Ranger ang motorsiklo ni Eu­sebio kung saan umang­kas rito ang holdaper na si Charlito Azarcon na ar­mado ng M-203 grenade launcher habang nakiki­pag­barilan sa tumutugis na mga awtoridad. Ang nasabing insidente ang dahilan kung bakit sina­sabi ng PNP na ‘judge­ment call’ ang naging hak­bang ng kanilang mga tauhan.