Mas maagang magsasara kesa sa karaniwang oras ang operasyon ng dalawang linya ng Light Rail Transit (LRT) sa Disyembre 24 at 31 ayon sa anunsyo ng pamunuan nito kahapon.
Sa inilabas na statement ni LRTA Administrator Melquides Robles, imbes na 11:00 ng gabi ay aagahan ng tatlong oras ang operasyon ng LRT Line 1 kaya ang huling tren na bibiyahe mula Baclaran patungong Monumento at Monumento hanggang Baclaran ay alas-8 ng gabi.
Sa Line 2 naman, huling biyahe ng tren ay aalis ng alas-8 ng gabi sa Santolan station hanggang Recto at alas-9 naman mula Recto patungong Santolan. Paliwanag ni Robles, sasamantalahin nila ang nasabing oras sa pagtingin ng mga tren upang mas maging ligtas ang mga commuters na tumatangkilik sa kanila.
Paliwanag pa ni Robles na base sa kanilang record, ang mga ganitong panahon ay kaunti na lang ang ma nanakay dahil halos lahat ng mga tao ay nasa kani-kanilang mga pamilya upang sama-samang salubungin ang Pasko at Bagong Taon. (Edwin Balasa)