Lola nilooban, binurdahan ng saksak

Isang 86-anyos na lola ang natagpuang burdado ng saksak sa kanyang silid matapos looban ng pinani­niwa­laang “Akyat-bahay gang” na posibleng mga ban­gag din sa iligal na droga, sa San Andres Bukid, Maynila, kahapon ng umaga.

Kinilala ang biktimang si Almodina de Ocampo, isang retired cashier ng Zapiro St., San Andres Bukid, na nagtamo ng walong tama ng saksak sa katawan.

Blangko pa ang pu­lisya sa pagkaka­kilanlan sa mga suspect.

Sa ulat ng pulisya, da­kong alas-7:00 ng umaga nang matuklasan ni Alice de Ocampo, anak ng bik­tima ang krimen, nang ma­­puna niya na nakabu­kas pa ang ilaw ng ku­warto ng ina sa mezzanine floor gayung umaga na.

Aniya, papunta siya ng comfort room nang magi­sing at inakalang gising na ang ina dahil nakabu­kas nga ang ilaw at bahagya ding naka­bukas ang pin­tuan.

Nabulaga siya ng ma­kita ang duguan at naka­lugmok na ina habang na­kakalat ang mga kaga­mitan nito at nawawala ang mga mamahaling ala­has at P2,000. cash.

Anang imbestigador, sira ang padlock sa liku­rang bahagi ng bahay na pinaniniwalaang pwersa­hang binuksan ng mga sus­pect na kanilang dina­anan.

Nabatid na mahim­bing na natutulog si Alice at kaibigan nito habang nasa kanyang silid ang biktima nang pasukin ng mga suspect.

Patuloy pa ang pagsi­si­­yasat upang matukoy ang mga suspect.