Isang kambal na binatilyo at isa pa nilang kasabwat ang naaresto ng pulisya makaraang gahasain ang dalawang dalagita sa Valenzuela City kahapon ng madaling-araw.
Nakilala ang kambal na sina Jeffrey at Jeremy Aguilar, 18, ng Padrinao St., Karuhatan ng lungsod na ito; at ang pangatlong suspek na si Jim Mark Roy Manli, 17.
Nakatakas naman ang mga kasamahan nilang sina Jomarie Canlas at Archie Obilio.
Sa ulat ni Insp. Ester Casanova, hepe ng Womens Children and Protection Desk, ang insidente ay nangyari noong Miyerkules ng hatinggabi sa may S. Padrino St., Karuhatan sa lungsod.
Bago nangyari ang insidente, ang dalawang biktimang itinago sa alyas na Ara, 14 anyos, at Mina, 16 anyos, ay hindi na nakauwi sa kanilang bahay matapos magpaalam sa kanilang mga magulang na mamasyal lamang.
Dahil sa hindi pag-uwi ng mga biktima ay nagpasyang hanapin ang mga ito ng kanilang mga kaanak hanggang sa masalubong nila si Ara at ipinagtapat ang nangyaring pang-aabuso sa kanila kung saan hawak pa ng mga suspek si Mina.
Agad na humingi ng tulong sa himpilan ng Police Community Precint 9 ang kaanak ng mga biktima hanggang masagip ang biktima at madakip ang tatlo sa mga suspek.
Sinasabing halinhinang ginahasa ng mga suspek ang mga biktima matapos nila itong painumin ng alak. (Lordeth Bonilla at Ricky Tulipat)