SWAT uniform bawal na

Ipinagbawal na ng pamunuan ng PNP-National Capital Region Police Office (NCRPO) ang pagsusuot ng SWAT uniform.

Ang kautusan ay sasaklaw sa mga pulis at ultimong miyembro ng SWAT team, security guards, tanod at mga sibilyang nahu­humaling sa Airsoft wargames at sa sinumang indibidwal. Bibirahin ng NCRPO ang sinumang indi­bidwal na mahuhuling magsusuot ng uniporme ng Special Weapons and Tactics (SWAT) team sa Metro Manila. Ayon kay NCRPO Chief Di­rector Jefferson Soriano, ginawa niya ang na­sabing direktiba dahil sa ginagamit ito ng mga ele­mentong kriminal.

“Ang directives ko sa ating NCRPO opera­tives, effective today, bawal ang magsuot ng SWAT uniform, ang susuway na indibidwal, bira­­hin nila,” ani Soriano sa ginanap na Talaka­yan sa Isyung Pampulis (TSIP) sa Camp Crame kahapon kaugnay ng misyong lansagin ang notoryus na sindikato ng robbery/holdup gang na gumagamit ng SWAT uniform. Nilinaw naman ni Soriano na ang ibig niyang ipakahulu­gan sa birahin ay arestuhin at ’di shoot-to-kill pero kung pumalag gaya ng pagbunot ng armas gayundin ang magpapa­putok laban sa mga awtoridad ay barilin na.

Ang direktiba ay ipinalabas dahil sa talamak na robbery/hold-up sa Metro Manila kung saan ang mga suspect ay nagpapanggap na mga alagad ng batas at pawang nakasuot ng uni­porme ng SWAT team. Ayon pa kay Soriano, ang blue uni­form na opisyal na kasuotan ng PNP ang ma­aaring isuot ng SWAT men kahit pa may ope­rasyon ang mga ito. (Joy Cantos)