Presyo ng cooking gas ibababa nang P150?

Matapos ang “big-time” rollback sa presyo ng produktong petrolyo ay asahan ang isa na na­mang maagang Pa­mas­ko sa taumbayan mata­pos na ianunsyo kaha­pon ng Department of Energy na bababa ng hanggang P150 kada 11 kilo­gram ang presyo ng liquefied petroleum gas.

Sa panayam ka­hapon kay Energy Under­sec­retary Zenaida Monsada, sinabi nito na sa laki ng ibababa ng contract price ng LPG sa pandaigdi­gang pa­milihan ay uma­abot ang komputasyon ng DOE na maaaring mag­baba ng mula P100 hang­gang P150 ang pres­yo ng 11 kg. na tang­ke ng cooking gas.

Dagdag pa nito na ba­gamat malaki ang ibi­na­ba ng contract price nito sa world market ay hindi kaagad ito magre-reflect sa kasalukuyang presyo at gagawin ang rollback ng biglaan.

“Yung experience natin, ini-spread nila sa adjustment in one month. Huwag natin asahan na unang araw pa lang ng November mag-reflect agad ang presyo. Sa LPG di gaano kalaki ang in­ventory nila, di yan aabot, mga one month maxi­mum,” saad ni Monsada.

Sa datos ng DOE, uma­abot na lang sa $804 kada metriko tonelada ang presyo nito sa nga­yon mula sa pinaka­mataas na $936.50 kada metriko tonelada noong buwan ng Hulyo.

Samantala nauna ng nagpahayag kahapon ang Liquigas na magba­baba sila ng P3 kada kilo o P33 sa 11 kg. na tangke sa kanilang tindang LPG.

Inaasahan namang sa Lunes ay ang grupong LPG Marketers Associa­tion ang magsasagawa ng kanilang rollback su­balit hindi pa nila ina­anunsyo kung magkano ang kanilang ibababa sa kanilang tindang cooking gas. Ang LPGMA ang dealer ng Pinnacle, Sula, Cat, Omni, Nation at Island Gas.

Sa ngayon ay nagla­laro ang presyo ng 11 kg na tangke ng LPG mula P588 hanggang P647.

Samantala, may tat­long linggo pa umano bago magkakaroon ng rollback sa presyo ng tinapay.

Ang nasabing pa­hayag ng mga panadero ay matapos i-anunsiyo ng mga flour millers na P940 na lamang ang kada-sako ng harina.

Ayon kay Simplicio Umali Jr., presidente ng Philippine Baking In­dustry Group, nakabili na sila ng stock ng harina bago pa man ang nasa­bing anunsiyo kung saan magagamit lamang uma­no nila ang “discounted flour” sa loob ng tatlong linggo.

Sa nasabing rollback sa presyo ng harina, sing­kuwenta sentimos ang ibababa sa kada-piraso umano ng loaf bread at 25 centavos naman sa pandesal.

Sinabi rin ni Umali na hihintayin muna nilang madagdagan ang roll­back bago ipatupad ang pagbawas sa presyo ng tinapay para mas ma­ram­daman ito ng mga consumers. (Edwin Ba­lasa at Rose Tamayo-Tesoro)