Duwelo ng magkapitbahay: 1 patay
Hindi umubra ang dalang palakol ng isang binata sa dalawang patalim na dala ng kapitbahay nito matapos na mapatay ang una ng huli sa naganap na duwelo ng mga ito, kamakalawa ng hapon sa Valenzuela City.
Dead-on-arrival sa Valenzuela General Hospital sanhi ng mga saksak sa katawan si Noel Mendoza, 29 ng NorthVille 2, Bignay ng nabanggit na lungsod.
Nadakip naman ang suspect na si Mario Moraga, 40, at kapitbahay ng biktima.
Batay sa ulat, dakong alas-3 ng hapon nang mangyari ang nasabing insidente kung saan unang nag-inuman ang biktima at ang suspect kasama ang ilan nilang kapitbahay sa nasabing lugar nang magkapikunan ang mga ito.
Ilang minuto pa ay nagsuntukan umano ang biktima at ang suspect na agad namang naawat ng ibang kainuman hanggang sa mag-uwian na ang mga ito.
Ilang sandali pa ang lumipas ay pinuntuhan umano ng suspect ang biktima sa bahay nito habang dala ang dalawang patalim at muling hinamon.
Dahil dito, lumabas ng bahay ang biktima na may dalang palakol at sinagupa ang suspect subalit hindi ito umubra makaraang mapatay ng huli. (Rose Tamayo-Tesoro)
- Latest
- Trending