Dalawang pulis ang nasawi sa dalawang magkahiwalay na karahasan sa Caloocan City kahapon.
Nauna rito, isang pulis na miyembro ng Special Weapon and Tactics ang nasawi nang bugbugin at hatawin ng bakal sa ulo ng ilang lalake sa Camarin, Caloocan City kahapon ng madaling-araw.
Namatay habang ginagamot sa FEU hospital ang biktimang si SPO1 Ricardo Agacel.
Nakatakas naman ang mga suspek na sina Danny Natividad, 30, ng Zapote Road at dalawang kasama nito na nakilala lang sa mga alyas na Aldrin at Louie.
Base sa ulat, alas-3:15 ng madaling-araw, sakay ng kanyang motorsiklo ang biktima nang madaanan nito ang mga suspek na nambabato ng bote sa kalsada sa tapat ng Cebuana KTV bar sa Durian St., Zapote Road, Camarin.
Sinita ng biktima ang mga suspek at nagpakilalang pulis subalit pinagtulungan siyang bugbugin ng mga ito kung saan isa sa mga ito ang pumalo ng tubo sa ulo ng una.
Samantala, isang opisyal ng pulisya na si Insp. Pete Leslie Quiros, 42, na nakatalaga sa Camp Olivas sa Pampanga, ang nasawi nang pagbabarilin ng isang kapitbahay niyang umano’y retiradong pulis na si Cezar Santos at anak nitong si Carlito sa Maypajo, Caloocan City kahapon ng umaga.
Nadakip si Santos pero nakatakas ang anak nito. Nabatid na pinagbabaril umano ng mag-ama ang biktima nang sitahin nito ang pagdadala nila ng armas. (Lordeth Bonilla)