Bangkay ng GRO natagpuan sa condo

Pinipigil ngayon sa himpilan ng pulisya ang dalawang Afri­can national matapos na madis­kubre sa bahay ng mga ito ang bangkay ng isang 21-anyos na Guest Relation Officer (GRO) sa Pasig City kamakalawa ng hapon.

Kinilala ang mga suspek na sina Christo Daniels, 48, live-in partner ng biktima at Ronald Terense, 48 , kapwa residente ng #12 Narra St., Valle Verde III, Brgy. Ugong ng lungsod na na­banggit. Samantala, pinag­ha­hanap din ang ka­tulong ng mga ito na nakilalang si Daisy Libuna, tubong-Iloilo na hindi na rin bumalik ng mag­paalam sa mga amo.

Kinilala naman ang biktima sa alyas Jenny, GRO ng Heart­beat Disco, ito ay natagpuang na­­aagnas sa loob ng stock room ng bahay na naka­silid sa itim na trash bag na mahigpit na tinalian.

Sa ulat, natagpuan ang bang­kay ng biktima matapos na hanapin ng stay-in drayber ng mga suspek na nakilalang si Andrew Manabat dakong alas-3 ng hapon. Laking gulat nito nang tumam­bad sa kanya ang na­aagnas na bangkay ng bik­tima nang mahanap ang pi­nang­galingan ng amoy mula sa nasabing plastic bag. Base sa imbestigasyon ng SOCO, may limang araw nang patay ang bik­tima base sa itsura ng bangkay nito.

Lumalabas sa ginawang imbestigasyon na nagpaalam umano si Jenny kay Daniels noong Huwe­bes upang mag­tungo sa Bulacan para bisitahin ang mga kaanak subalit hindi na umano ito bumalik pa. Biyernes naman nang magpaalam si Libuna kay Daniels para pu­munta umano sa mga kamag-anak dahil may ipinadala umano sa kanya at kukunin niya ito subalit hindi na rin bumalik.

Isang masusing imbesti­gas­yon ang gina­ gawa ng pulisya para sa agarang paglutas ng kaso at inaalam na nila ang puwe­deng puntahan ni Libuna para makapagbigay linaw sa na­sabing krimen. (Edwin Balasa)