Doktor tupok sa kotse

Patay matapos masunog ang buong katawan ng isang doktor, habang apat katao pa ang sugatan makaraang mag­liyab ang kotseng sinasakyan ng una makaraang banggain ng isang humahagibis na bus sa EDSA-Santolan, Quezon City kahapon ng madaling-araw.

Nakilala ang nasawi na si Dr. Francisco Moreno Sa­ra­bia, isang optometrist, habang kriti­kal naman at ginagamot sa St. Luke’s Medical Center ang pa­sa­hero nitong si Henny Garcia, 52. Ginagamot rin naman sa East Avenue Medical Center ang mag-asawang pasahero ng bus na sina Salvador at Ligaya de Guzman at kon­duktor na si Laurentino Betino.

Agad namang sumuko sa Quezon City Police District-Cri­minal Investigation and Detec­tion Unit ang driver ng Joanna Jesh bus na may plakang TYG-660 na si Marti­nito Madrid, 34. Tumanggi naman itong mag­bi­gay ng pahayag sa pulisya dahil sa payo ng kanyang abogado.

Sa ulat ng Quezon City Traffic Management Bureau, naganap ang aksidente da­kong alas-3:16 ng madaling-araw sa northbound lane ng EDSA-San­tolan. Nabatid na sakay sina Sarabia at Garcia ng Mercedez Benz na may plakang NFH-602 nang ma­ipit sa humintong commuter bus na magsasakay ng pasa­hero sa bus terminal ng Metro­politan Manila Develop­ment Authority (MMDA).

Tinangka namang kuma­liwa ng Benz kung saan dito na ito nabangga ng huma­hagibis na bus ng Joanna Jesh buhat sa likuran. Dahil sa lakas ng pag­ka­kabangga, dalawang beses pa umanong umikot sa kalsada ang kotse ng may 25 yarda.

Isang taxi driver naman na nakasaksi sa insidente ang nagmagandang-loob na sak­lo­lohan ang mga sakay ng kotse. Nagawa nitong ma­ilabas sa sasakyan ang walang malay na si Garcia at babalikan pa sana si Sarabia nang magliyab na ang kotse sanhi ng pagkaka­sunog ng biktima.

Sa inisyal na imbesti­gas­yon, pinaniniwalaan na naki­kipag­karerahan si Madrid sa isa pang bus ng Joanna Jesh na mina­ma­neho naman ni Francisco Cunahap na naging dahilan ng aksidente.

Nag­tungo rin naman sa QCPD si Cunahap na iginiit na hindi sila nagkakarerahan ngunit ma­bilis talaga ang ka­nilang takbo.