Itinanggi kahapon ng tiyo ng nagpakamatay na 18-anyos na binata ang unang lumabas na balita na iniwan ng nobya ang kanyang pamangkin kaya ito nagpakamatay.
Kahapon, nagtungo sa tanggapan ng PSN si Bernardo Quijano, 37, at itinanggi ang ulat na kaya nagawang magpakamatay ng kanyang pamangkin na si Roberto Quijano ay dahil sa pag-iwan dito ng nobya.
Nilinaw nito na hindi naghihiwalay ang magkasintahan kasabay ng pagsasabing wala pang malinaw na dahilan o nakikitang motibo kung bakit nagpatiwakal ang kanyang pamangkin sa pamamagitan ng pag-inom ng silver cleaner.
Sinabi ni Bernardo na tanging ang kanyang pangalan lamang at relasyon sa nasawing si Robert ang sinabi niya sa imbestigador at wala siyang sinasabing anumang dahilan ng pagpapakamatay nito dahil talagang hindi nila alam. Tanging naalala ni Bernardo ay isang araw bago magpakamatay ang kanyang pamangkin ay napansin na niyang malungkot ito.