Isa pang kidnapper ng negosyanteng Tsinoy ang nasakote ng mga operatiba ng Police Anti-Crime Emergency Response (PACER) sa follow-up operation sa Novaliches, Quezon City. Nakilala ang nadakip na si Christopher Domla. Matatandaang una nang nadakip ang isa pang suspect na si Christopher Nanson. Ayon naman sa pahayag ng biktimang si Ka Kuen Chua, 46, sa kanyang pagharap sa mediamen matapos mailigtas ng mga elemento ng PACER sa rescue operations sa Brgy. Gulod, Novaliches, Quezon City na mabuti na lamang at buhay pa siya.
Inilahad ni Chua na nairita umano ang mga kidnapper dahil sa hindi kayang ibigay ng kanyang pamilya ang inihihirit ng mga itong ransom. Nauna nang humingi ng P30-M ransom ang mga kidnapper sa pamilya ni Chua pero P1.5-M lamang ang naibayad ng pamilya nito kaya’t tumanggi ang mga itong palayain ang negosyante. Ang mga kidnapper ay humihirit pa ng karagdagan sa P1.5-M ransom nang mailigtas ng mga operatiba ng PACER ang biktima na binantaan pa ng mga itong pa patayin kapag hindi nagbayad ang pamilya nito. (Joy Cantos)