Colonel patay sa pansit

Isang Air Force Co­lonel na kilalang Minda­nao war veteran pilot na malapit nang ma-pro­mote bilang heneral ang na­tagpuang patay sa loob ng quarters nito sa Villa­mor Air Base sa Pasay City kahapon ng umaga.

Sinabi ni Philippine Air Force (PAF) Chief Lt. Gen. Pedrito Cadungog ang biktimang si Col. Miguel Gequillo Guia­logo, 54, ay namatay sa atake sa puso matapos itong mag-ehersisyo.

“He died of a heart at­tack or acute myocardial infection. He just came from a Physical Fitness Test as a requirement to a Brig. Gen. position,” pa­hayag ni Cadungog.

Nabatid pa sa ulat ng pulisya, na matapos ang pag-eehersisyo ay ku­main pa ng pansit ang na­turang colonel. Ilang san­dali ang lumipas ay natag­puan na itong patay.

Sinabi ni Cadungog na si Guialogo ay naka­talaga bilang hepe ng Air Force Research and Development Center na nakabase sa Fernando Air Base sa Lipa City.

Ayon sa PAF Chief, si Guialogo ay natagpuang patay dakong alas-9:30 ng umaga sa Room 18 sa ikalawang palapag ng Married Officers Quarters sa Villamor Air Base na siyang punong himpilan ng PAF.

Inihayag ng heneral na isang malaking kawa­lan sa PAF ang pagka­matay ni Guialogo na isang mahusay na piloto at propesyunal na opisyal.