Sumugod kahapon ng umaga ang mga miyembro ng militanteng grupong Pinagkaisang Samahan ng Tsuper at Operaytors Nationwide sa tanggapan ng Pilipinas Shell sa Makati City upang iparating nila ang kanilang pagtutol sa paunti-unting rollback sa presyo ng produktong petrolyo.
Ayon kay PISTON spokesperson George San Mateo, kulang ang paunti-unting rollback o pagbabawas sa presyo ng langis tulad ng diesel. Hinihiling nila ang isang “one time bigtime rollback”.
Dagdag pa ni San Mateo, hindi maramdaman ang hulug-hulugang pagbabawas sa presyo ng petrolyo dahil hindi naman bumababa ang presyo ng pangunahing bilihin kaya parang balewala rin umano ito sa drayber.
Sinabi naman ng isang kinatawan ng Shell na malabo ang “one time bigtime rollback dahil kailangan pang mabawi ng kumpanya ang lugi nito sa mga nakaraang sunud-sunod na buwang pagtaas ng presyo nito. (Edwin Balasa)