2 container van, gagawing court room

Para sa mabilisang pag­­dinig sa mga kaso, pina­­sinayaan kamakalawa ang dalawang container van na ginawang mobile court sa covered court ng Old Bilibid compound, sa Manila City Jail, Sta Cruz, Maynila upang doon na gawin ang mga pagdinig sa mga kasong naka­bimbin na kinakaharap ng mga bilanggo.

Sinabi ni Manila Mayor Alfredo S. Lim na sa pama­magitan ng nasabing mo­bile courts,matututukan na ang mga kaso ng mga preso partikular ang mga nabuburong kaso dahil sa kawalan ng abugadong nag-aasikaso at ang ilan ay lumalagpas na sa dapat na panahong ipagsilbi sa sentensiya.

Bukod pa rito, maalis na rin ang panganib sa pag­bi­biyahe ng mga bi­langgo na kung minsan ay nauuwi sa trahedya tulad ng pangho-hostage at pang-aagaw ng baril mula sa mga escort o pagtakas.

Anang alkalde, mis­mong ang hukom na, pis­kal at abogado ng mga aku­­sado ang pupunta sa MCJ para sa naka­takdang mga pagdinig.

Pinasalamatan ng al­kalde si International Con­tainer Services Inc (ICTSI) President at Chair­man of the Board Enrique K. Razon sa pagkakaloob ng mobile courts.

Ang inisyatibong ito ni Lim ay kauna-unahang pro­yekto sa 17 local go­vern­ment units para sa kapaka­nan ng mahi­hirap na bilanggo at bilang pagtugon sa programa ni Supreme court Chief Jus­tice Rey­nato Puno sa ‘Justice on Wheels’ na may layuning mapabilis ang proseso sa pagbi­bigay ng katarungan. (Ludy Bermudo)