Pulis na magso-solicit kakalusin

Binalaan kahapon ni National Capital Region Police Office (NCRPO) Chief Director Geary Barias ang kanyang mga opisyal at tauhan na mahaharap sa kasong administratibo at kriminal ang sinumang pulis na mapapatunayang nagso-solicit o nanghihingi ng do­nasyon sa pagsisimula ng “ber months” na hudyat ng nalalapit na Kapaskuhan.

Sinabi ni Barias na kapag napatunayang guilty ang mga pulis ay maari ang mga itong masibak sa puwesto at madismis sa serbisyo.

Ginawa ni Barias ang pahayag matapos na ma­katanggap ng report hing­gil sa umano’y maagang racket ng mga tiwaling pulis na nagsisipag-solicit na at nagbebenta ng mga ticket na iniaalok ng mga ito sa mga negosyante.

Batay sa report, baga­man nagsisimula pa la­mang ang “ber months” ay may mga tiwaling pulis na ruma-racket na sinasa­mantala ang hudyat ng nala­lapit na pagdiriwang ng kapaskuhan sa bansa.

Dahil dito, ayon kay Barias ay nagpalabas na siya ng direktiba na nagba­bawal sa mga pulis na mag-solicit ng pera o anu­mang donasyon at maging ang pagbebenta ng mga ticket sa mga maya­yamang negosyante ka­bilang ang mga Filipino-Chinese.

Sinabi ni Barias na lumang tugtugin na ang nasabing racket ng mga tiwaling pulis dahilan isa itong uri ng pangingikil o extortion na maaring maging basehan para masampahan ang mga ito ng kaso. (Joy Cantos)