IA reresbakan ng konseho

Takdang talakayin bu­kas ng Manila City Council ang hakbang o parusang dapat gawin laban sa mga opisyal ng Intramuros Administration na walang habas na pinaputol ang mga punongkahoy sa Plaza Roma sa tapat ng Manila Cathedral.

Ito ang nabatid kahapon kay 3rd District Councilor at Majority Floor Leader Manuel “Let-Let” Zarcal na nagsabing nagpasa na sila ng resolusyon na kumo­kon­dena sa pagputol ng mga nasabing puno kasabay ng rekomendasyon na dapat na kasuhan at parusahan ang mga namumuno sa IA.

Sinabi ni Zarcal na ang pagputol ng mga nasabing puno ay hindi lamang pag­labag sa ecological preservation kundi kawalan ng respeto sa Konstitus­yon ng Pilipinas na nagsa­saad na dapat na kaila­ngang pro­tek­tahan ang karapatan ng bawat ma­ma­mayan na magkaroon ng malusog na kapaligiran.

Sinabi pa ng konsehal na marami nang heneras­yon ang dumaan na suma­bay sa paglago ng mga pu­nong­kahoy na naka­tulong nang malaki sa kapaligiran lalo na sa Intra­muros na may malaking bahagi sa kasaysayan ng Pilipinas.

Iginiit ni Zarcal na dapat munang gumawa ng kon­sultasyon ang pamu­nuan ng Intramuros bago isina­gawa ang pagputol ng puno dahil posible ring ma­ka­apekto ito sa kinabu­ka­san ng mga bata.

Tila anya hindi binibig­yang-halaga ng IA ang mga punongkahoy na mas matanda pa sa kanila at isang biyaya sa mga Ma­nilenyo. Kabilang sa mga punong pinutol ang Narra at Mahogany. (Doris Franche)