Hindi nabalatuhan namaril

Binaril at napatay ang isang 22-anyos na lalaki matapos   nitong hindi balatuhan  ang sus­pek nang manalo ang una sa karera kamakalawa ng gabi sa Caloocan City.

Dead-on-arrival sa FEU Hos­pital sanhi ng tama ng bala sa katawan ang biktimang si Dave Dunn Fabiana, ng Saint Jude ng nabanggit na lungsod.

Samantala, inaalam pa ng pulisya ang pangalan ng sus­pek na kaagad na tumakas ma­tapos ang pamamaril. Ayon sa imbes­tigasyon ng pulisya, naganap ang insidente dakong alas-8 ng gabi sa ka­habaan ng Zapote Road, ng nabanggit na lugar. Nabatid na nanalo  sa karera ang biktimang si Fabiana ,  kung saan namigay pa ito ng balato sa tapat ng nasabing OTB.

Ayon sa ilang saksi, hindi  na­bigyan ng balato ng biktima ang suspek, na ikinagalit nito hanggang sa bumunot ng baril at paputukan ang biktima. Ma­tapos ang insidente ay tumakas ang suspek habang dinala naman ang biktima sa nabang­git na pagamutan, subalit hindi na ito umabot ng buhay. (Lordeth Bonilla)